Jeff Baden: Carlo Hemmer
Jeff Baden: Carlo Hemmer
„Dausend Weë bas de gaangen – iwerall wars du doheem ...“
De Carlo Hemmer – e groussen Humanist, Naturfrënd, Kulturvermëttler a Philanthrop. Mir invitéieren iech häerzlech op eng Konferenz mam Jeff Baden, dënschdes, den 19.Mäerz 2023 um 19.30 Auer an der Ettelbrécker Bibliothéik.
Dës Konferenz vermëttelt e perséinlech inspiréierten Aperçu vum Liewen a Schaffe vum Ettelbrécker Carlo Hemmer (1913-1988) mat senge ville Facetten, gräift dobäi besonnesch e puer (bewosst subjektiv) ausgewielt Aspekter aus senger beweegter a spannender Vita eraus a wëllt virun allem mat Respekt erënneren un dëse grousse Personnage, dee seng Spueren a ville Beräicher am ëffentleche Liewen vu Lëtzebuerg hannerlooss huet.
Heibäi kommen ë. a. dem promovéierten Economist säin Engagement fir d’Jugendherbergwiesen an d’Jugend am allgemengen, seng Léift a säin Asaz fir d’Natur, seng villfälteg berufflech Aktivitéiten, seng sëllege Reesen uechter d’ganz Welt, d’Grënnung vun der Zeitung „D’Lëtzebuerger Land“ a. v. m. zur Sprooch.
De Jeff Baden ass Philolog an Enseignant fir Lëtzebuerger Sprooch, Kultur a Literatur.
Mir freeën eis op äre Besuch!
Fräien Entrée - Keng Reservatioun
